****ا
لحلقه الحاديةعشر/

الساعه ٢بالليل والناس نايمين والشقه هدوء مره، الصاله نايم فيهاأبو محمد والغرفه فيهامعاذ وعمته وأبو مصعب قايل (إقريهالحالك )تذكرت البلكونه فاضيه لبست شرشف صلاتي ومريت الصاله وشوي شوي دخلت البلكونه بهدوء ،فتحت الورقه وبدون مبالغه حسيت إنه جنبي ،أم مصعب ماأوصيك على نفسك والعيال المرض زي ماإنت شايفه يمكن مايمهلني كثير ، (لأنهم قالواعمليةالنخاع ماعاد لهاداعي لأنهاماعادتنفع )راضين بقضاء الله وقدره وماينفعناإلارحمته سبحانه إلي يحيي العظام وهي رميم، بس إذاكان في العمر بقيه تراك ماقصرت معي وماني قادرأجيب جزاتك أبيك تحلليني في أي خطأ جاك مني وتراه أكيد بدون قصد عيالي ربيهم زين والله الله في الصلاة بيتكم لاتبيعونه مهماكانت الظروف خليه للأولاد لين يكبرون أبيك في الزياره الجايه تحلليني وأبي أسمعها منك "أنتظرتراي ، خلصت الورقه الي الخط كان فيها رديئ تدرون ليش ؟ لأنهم في المستشفى مربطين يدينه في السرير حتى وهو نايم و مايدري عن نفسه لا يقطع الأسلاك فيأذي نفسه،وكان الخط رديئ لأنه يكتب وهومربط؟مادريت عن نفسي إلاالدموع مغرقتني وأبكي بصوت مكتوم عشان النايمين مايسمعون ،وش تقول إنت؟ أنامابيك تموت ولاتوصي الله يخليك لنا لاتروح وتخلينابيتنا نسكنه إحناوياك إن شاء ولانحتاج نبيعه تقصير خطأ ماجاء منك إنت غير عن كل البشر، بعدين ليش المشاعر الحلوه بين الزوجين تأجل بس لمثل هالظروف ليش كل واحد من الزوجين مايتنازل عن كبرياءه المزعوم وقوة التحمل في الصد ماتوجه للخير وتوظف في الحب ولأجل الحب ليييش ؟ترى إذافات الفوت ماعاد ينفع الصوت ،طلعت من البلكونه ورحت الغرفه وصليت ركعتين دعيت فيهاالله إنه يشفيه ويخليه لنا.


******************
الحلقةالثانيةعشر/

رحت الزياره الثانيه ولماخلونا لحالنا سألني عن الورقه موكلام طبعالأن فمه وخشمه كلها ليات كتب لي في ورقه الي صارت الكتابه هي وسيلة التخاطب بينا بالخط المهزوز المهم كتب لي قريتي الورقه قلت إيه وشكرا على الكلام الي كتبته وقفت شوي ماأقدر أقول حللني وأنت بحل عندهاضغط على يدي بقوه يعني كملي ماقدرت أكمل هزيت راسي وأناأبكي يعني ماأقدر أكمل هو فهمهاشي ثاني فهمهاماأقدر أحللك !دخل أخوه وكل واحد غرقان في دموعه طلعني وجلس عنده،تكررت الزيارات وبس يشتكي من سوء المعامله في المستشفى وكلهاكتابه طبعا جمله أثرت فيني كثيروهي بعد شكواه من سوء المعامله يقول: (وخصوصالمادرو إني سعودي )وهذايبين عدائهم للعرب لاتقولون ليش ماقدمتم شكوى إحناكنانبي سلامته والسلام ومازلت أحتفظ بكل كتاباته ذات الخط المهزوز،في كل مره أشوف في عيونه نظرات يالله قولي بس ماقدرت إستمريناعلى هالحال إسبوعين في كل مره أرجع من الزياره تسألني وحده تعرفت عليهاهناك إسمها (مشاعل )وهي مطوله وتعرف وش يصير وقد مرت عليهاحالات مثل كذاوأكثر،هاه قلتي له إنك محللته وطلبتي منه الحل (هي طبعا ماتعرف شيء عن الورقة)أقول لها ماأقدر تغصني العبره قالت ترى تندمين والله لويصيرله شي( لاسمح الله) عزمت إني أضغط على نفسي وأقول بكره ويصير إلي يصير أهم شي يرتاح هو مع إنه ماجاء منه تقصير، لبست عبايتي طايره من الفرح موعد الزياره قرب وبروح بسرعه أقول له إني محللته أبومحمد جالس في الصاله ماركب السياره وجهه متغير أبومحمد محنارايحين الزياره ؟لا ،ترى مي سهله كلمة لافي ذاك الوقت لأنهاتحمل معنى واحد بس إن أبومصعب موطيب ولاصار له شيئ ،ليه ؟ وأناقلبي ينبض بسرعه ،عدل جلسته وتغيرت نبرة صوته وقال أبومصعب سأت حالته أمس وسووا له عمليه مظطرين في القصبه الهوائيه لتوسعة مجرى التنفس وهوفي غيبوبه تامه وبكره بنطل عليه،يعني في غيبوبه زيهم مايحس بشيئ ؟بس ينتظرشوي أقول له والله محللتك ماأقدر أتخيلك بتصحى وإلامنت صاحي من هالغيبوبه وتسمع لي وينك من زمان يامشاعل مانبهتيني؟الله يسامحك بس موذنبك ذنبي أنا إلي ماحسسته بكذا أبومصعب لوترد علي أقول لك كلام كثير كنت مأجلته لاتخليني غريبه بغربتك في دنياغريبه والله أحبك وماأقوى على فراقك.

الحلقةالثالثةعشر/
رحت للزياره بسرعه توجهت للسرير(٢٢ )ماحصلته فيه طاح قلبي أخذت أسأل كأني مجنونه ٢٢ردو علي إنه إنتقل لغرفه خاصه نظرالحالته الصعبه دلونا على الغرفه لبسوناملابس أكثرمن الأولى وأعقد ،صوت الآلات أكثر إزعاج من الأول الآلات كثيره الغرفه مزدحمه بالأطباء شي واحد تأكد لي إن حالته تزداد سوء ،قربت منه جهاز جديد في حلقه ورقبته مانقدرنميزهامن القطن الطبي التنفس سريع والغرفه جدامخيفه حطيت يدي على راسه وأناأصيح وقعدت أقراعليه وأدعي له من كل قلبي يعافيه ربي من ماهوفيه،اشتقت لك ياسرير(٢٢)على الأقل كان يكتب لناونكلمه ويضحك لناأماألحين في غيبوبه ولافيه أدنى تحسن ،قعدناعلى هالحاله لمدة إسبوعين نروح كل يوم ثلاث مرات زياره نقرأعليه ونجلس عنده لين ينتهي وقت الزياره وهو نفس النايم مايتحرك إلامرتين جداأفرحتني الأولى لماكنانقرأعليه فتح عيونه وقعد يناظر السقف وهويبتسم والثانيه لماكان أخوه يقرأعليه ووصل آية(أمن يجيب المظطر إذادعاه ويكشف السوء)فتح عيونه وقعد يأأشر بالسبابه للسماء وهويبتسم وكلهاوهوفي الغيبوبه،وقعدناكذا حتى قالوالناالأطباء إنهم باقي بيسوون له عمليه أخيره في القصبه الهوائيه عشان يرقعونهالأنهامثقوبه من كل مكان وبياخذون لهاغشاء من القلب يرقعونهافيه وماخيرونا في العمليه لأنهاضروريه بس حبوايعلمونا،سوواالعمليه وماعملواحساب للي فاجأهم لمابدو افي العمليه وأخذواغشاء القلب وفتحواالحلق وبدويغلفون القصبه الهوائيه بالغشاء إنهارت القصبة الهوائيه في إيدينهم تفتتت أزالو جميع أجزاء القصبه من الحلق وأغلقوه كماهو بدون قصبه العمليه فشلت، قدرالله وماشاء فعل الرئتان تضخان الأوكسجين للجسم فقط أماالرأس فلاموصل له لأن القصبه اليتيمه تهالكت ولكم أن تتخيلواشكل الرأس بدون وصول الأوكسجين له ،علم أبومحمد بالخبر قبلي وجاء يخبرني بالحقيقه المره ومثل ماأنازوجته هوأخوه ومصابنا واحد،أم مصعب :ترى سوواالعمليه ،إيه بشر؟ ،مانجحت !بيسوون ثانيه صح؟أم مصعب إحنا مؤمنين بالله ونعرف إن كل شي مكتوب إلي أقدر أقوله إنهم يقولون القلب قدامه ست ساعات يضخ الأكسجين للجسم وبعدهايتوقف،ست ساعات ويتوقف يعني إذاتوقف القلب يموت وهذاالي بيموت إسمه أبومصعب يعني زوجي أبوعيالي ماني قادره أتخيل قطع تفكيري صوت أبومحمد ست ساعات بس خلينانكون معاه في آخرساعاته من الدنيانقراعليه ونتصبرلأن الصبرعندالصدمه الأولى ونتحلل منه ويحللنا كلمة (نتحلل منه) هذي خلتني أأجل التفكيرفي موته وأحقق أمنيتي الأخيره وإنه مايموت إلاوهومرتاح ،ركبناالسياره وتوجهناللزياره ودخلناغرفته مالبسوناملابسهم مااستعجلونافي الخروج من الزياره كل شي تغير عن الزيارات الأولى الآلات مالهاصوت الأسلاك مافي جسمه شي موصل الغرفه فاضيه من الأطباء كل شيئ هادىئ إلاجهاز تخطيط القلب الي يشتغل وجه أبومصعب منفخ وراسه بعد وهذامن تأثير عدم وصول الأوكسجين لهم حلقه مخيط بأكثر من عشرين غرزه وكل شيئ يدل على قرب خروج الروح، قعدنانقرأعليه ونمسح راسه ونبكي بهدؤ تدرون ليش لأن الله في ذاك الوقت يصبر المؤمن وله الحمد والمنه، جسمي ماعاد يشيلني أحس بدواروأحس إني بطيح وهذاإلي مابيه أبي أتصبر طلبت من أبومحمد يوديني الشقه ماقدرت أتحمل أبي أروح أصلي وأدعي له أحسن من الطيحه في المستشفى وكانت هذي مهي فكرتي أنابس حتى أبومحمد وأخته ودهم يروحون ويرجعون بعد ساعه لأننالناأربع ساعات على هالحاله ،رحناالشقه وصلينا _أبومحمد قال روحتكم مالهاداعي بعد إذاصار شي بلغتكم وراح للمشتشفى وقعدأربع ساعات ثانيه وندق عليه مايرد حسينابعدهابالي صار بس مع ذلك ودناأحد يقولها بالصريح قعدنابعدهاأربع ساعات أخرى آخرشي نفذ صبرنا قلت لازم نكلم واحد من إلي في السكن معانا يشوف وش السالفه.

*****************

الحلقةالرابعة عشر/

جرس الشقه يرن دخلت وحده من إلي معانا في السكن مرسلهازوجهاتصبرنا(توفت ألحين الله يغفر لها ويسكنها فسيح جناته آمين) وكان الوقت سته صباحا الإثنين ٩/٤/١٤٢٤ سلمت ودخلت إحناعارفين الأمر وشبه متأكدين بس نبي إلي يصرخ بهافي وجوهنا ويقول أبومصعب يطلبكم الحل المهم ناظرت وجيهنا عليها علامة استفهام أخيرا قالت :عظم الله أجركم ،ياالله هذي الكلمه سمعتها كثير وفي ناس كثيربس مهوب لي ولافي أبومصعب انتبهت عندهاإني مااسترجعت (إنالله وإناإليه راجعون اللهم آجرني في مصيبتي وأخلف لي خيرامنها)دخلت الغرفه وقعدت أصيح قام معاذ من النوم على صياحي (ماما)ليش تصيحين ناظرت فيه وسألته ودك نرجع السعوديه رفع صوته لاياماماوبابا قلت :خلاص باباراح لالله وماعاد قدرت أتكلم وبكيت أكثر قال لي حبيبي معاذ مامالاتبكين الله مووحش !يعني متطمن لروحةأبوه عند الله موخايف واناالكبيره إلي أعرف أجر الصابرين قاعده أصيح والله كفكفت دموعي وتصبرت وطلعت للحريم الي جايين يعزون،كان من بينهم مشاعل إلي قالت لي لازم تشوفينه بعد ماطلعت روحه عشان ترتاحين لأن شكله أول من التعب بيكون شين وبعد طلعةالروح يكون أحسن إن شاء الله،إن كنت يامشاعل ماطعتك في الأولى وندمت إن شاءالله ماأفوت الثانيه ،طلبناشوفته وحصل لنامبتغانا الله يوفقك يامشاعل دنياوآخره قولوا(آمين) لماشفته كان في تابوت أبيض والشراشف بيضاء وراسه راجع لوضعه الطبيعي وشعره أسود كثير وعوارضه غزيره ولونه أبيض ومبتسم والله كأنه نايم وعلى بسمه خفيفه الله يختم له بالخاتمه الحسنه،(لا أزكيه ولكن هذا والله مارأيت دون زيادة)ارتحت لماشفته وراحت من مخيلتي الصوره الأخيره إلي شفتهاله في المستشفى ،نمت ذيك الليله بدون أي إحساس بس أتسآل كيف برجع بدونه؟ حلمت حلم جميل وإني جايته في المستشفى وأناإلي أقول له حللني وهويضحك مستانس قمت مستانسه إني وصلت له إلي أبي حتى لومهوب في الحقيقه.
تحياتي للجميع وإنتظروا الحلقة الخامسة عشر والأخيرة والتي تحمل بين طياتها المفاجأة.