(((( الحلقة الســـــابعة عشـــر ))))


نزلت بندر وصالح عند سوبر ماركت .. ومشيت ورجعت لها على نفس الشارع اللي هي تمشي فيه ... ويوم قربت منها حسيت بأحساس غريب جداً ورعشة في جسمي وشئ يخرفش في صدري وأحس أن بطني فيه هواء كني راكب قطار الموت ..

مر أمام عيني شريط الذكريات في غضون ثواني ... وانا جنب نوف مشيت وتعديتها وانا أناظر فيها وهي لا بسة عباية على الرأس وقفازات وجوارب سوداء بس كانت مبرقعة وانا بصراحة ماهقيت أن البراقع يفتنني شكيت قلت لا يكون أني غلطان ولا شئ ولفيت من وراء المعهد وجيت راجع .. شافتني أتصلت فيني .. قالت أرجع يامحمد ... ملاحظة : هذي أول مرة في حياتها تشوفني وأول مرة أشوفها ...


رجعت مرة ثانية وانا مهدئ مرة قالت .. أوقف عند باص المعهد وقفت عند باص المعهد ... قلت أي وحدة أنتي قالت أنا الطويلة ... وتذكرت أنها سبق أن قالت لي في أحد مكالماتي لها بأنها طويلة وملتزمة البنت .. المهم أني وقفت وانا أرتجف أرتجاف الخايف الرعديد ..


جاتني تمشي وترش مع خطواتها مسكٍ وريحان ... جتني تمشي وتطّهر الأرض اللي تمشي عليها .. وجتني ومعها صديقتها شاهه .. الله من زين الأسم .. شاهه واقبلت وانا أناظرها بالمراية ... أقبلت تمشي تقل محدٍ معها أقبلت سنا الفضة .. أقبلت يا حلاها شمس الأقبالي يوم شفت الحسن والزين كاسيها .. فز قلبي عليها وأنشغل بالي ..لا أحد يشوفها من معارفها ويعرفها ولا تتورط ولا تجي الهيئة ولا شئ بس كانت قوية البنت قالت مدام أني معاك يامحمد خله يصير اللي يصير .. حاولت تفتح الباب تبي تركب .. هي وصديقتها ورفضت وبشدة قلت لها يانوف أن ركبتي معي تراك بتطيحين من عيني .. قالت أوكية يامحمد ..

المهم .. فتحت الشباك الأيمن طلت علي وانا مشخص طاق ذيك النظارات الشمسية ( طالع جيمس بوند ) هههههههه المهم أنها طلت علي ومدت اللي في يدها وأخذت اللي معها .. وعطيتها اللي معي .. (الهدية) تبادلنا الهدايا .. ومشيت في الحال .. خذيت الشباب ورحنا المسجد على طووول صلينا الظهر والعصر جمع قصر .. بعدها أتصلت فيني .. وقالت وينك يامحمد انا طلعت من المعهد ..

قلت طيب والمطلوب .. قالت لا بس حبيت أطمن عليك .. قلت لها أنا بخير قالت محمد تعالي عند الكلية .. أي كلية قالت أنا رايحه كليتة التربية ... وما أدراكم ما كلية التربية .. صارت هي راكبة الباص مع صديقاتها مريت جنب الباص .. الله اللي ستر علينا ما متنا ذاك اليوم .. شوي الا هي تكلمني قالت محمد التفت على الباص طبعاً الباص مظلل ..

التفت الا أسمع صوت صراخ بنات بصوت واحد وضحك .. ومدري وش السالفة .. طلعت البنت تتباهي بي قدام صديقاتها .. أنا بصراحة ماتحملت الموقف ومشيت تعديتهم قلت في نفسي .. هذي ديرة بدو والله أن يخنزلنا في ذا الديرة محدٍ درابنا ..

مشينا علي أساس أنا طالعين من الديرة .. أتصلت فيني وقالت محمد تغديت قلت لا والله ماتغديت ,,, قالت حبيبي لازم تتغداء .. قلت أوكية ابتغدي أن شاء الله ... قالت كم واحد معك .. قلت أثنين بندر وصالح ..

قالت طيب شوي وأكلمك ..

وشوي وهي تتصل .. قالت محمد تعدي الدوار الثاني بتحصل مطعم أسمة ( وردة لبنان) روح هذا المطعم أبيك تتغدي فيه .. قلت أوكية وش المناسبة قالت بس أحب هذا المطعم وودي أني تاكل منه ,,,

قلت مافيه مشكلة .. رحت ساعة مادخلت المطعم وقبل أطلب أتصلت فيني مرة ثانية ,, وقالت وصلت .. قلت : أيه وصلت ... قالت وين جالس .. قالت جلسة رقم 3 .. قالت .. طوط طوط طوط

سكرت بسرعة ... شوي الا العامل جاي بالسفرة .. حط السفرة .. ونزل مقبلات شوي الا صحن مشاوي .. شوي لا طاجن بالفرن .. شوي الا بيتزا وفطائر .. شوي الا البيبسي .. قلت هيه هيه بس خلاص وش هذا انا ماطلبت شئ .. قال صاحب المطعم ,,, هذا الطلب من أشتراك رقم كذا .. والحساب واصل ,,,

كيف وشلون ...؟؟؟

قال : هيك بدهن الصبايا .. قلت : خذ الله وجهك ضاعو الرجال ..

أتصلت فيها ماترد ... شوي الا وهي مرسلة رسالة .. تقول فيها ..


" حبيبي لازم تتغدي ... لوبيدي أجي والقمك بيدي .. ياحبيبي أكل وتغد وعين خير ..
وأسكت أسكت وانا أدري أن هذا مو حقك ولا واجبك .. ياقلبي ولا تزعل علي .. "

بعدها جلست أضحك .. قلت والله البنت راعية علوم .. بصراحة أحرجتني مع أخوياي ,, البنت تغدينا والله مابعد صارت في العالم .. أنا أشهد أنها بنت أبوها ... يأبروني هيك بنات ..


بعدها أتصلت فيها .. وهي اللي تضحك .. وتقول أن شاء الله اعجبك الأكل ,, قلت زين ياقلبي .. بس لاعاد تتعودينها .. وهي اللي تضحك .. وشوي سكتت .. قالت محمد

قلت سمي .. قالت أنت ملك .. قلت أنا أووووووووووف ملك مرة وحدة .. قالت أيه أنت ملك حياتي .. محمد أنت غير الناس عندي .. محمد أنت أنسان عظيم بكل ماتعنية الكلمة .. وانا أخاف عليك من نفسي يامحمد .. قلت يانووووف أنا الي مفروض أقول الكلام هذا ,,,

بندر أنا خفت عليك وعلى أخوياك من البنات لا يصكونكم عين ,,, قلت أنا لحووووول وش السالفة .. قالت البنات منهبلين منكم ... وانتبه يامحمد لاترد على أي رقم غريب يجيك .. تري البنات هينا كلاب ,, ملاعين يامحمد ماتعرفهم ,,, حسودين مايبون النعمة تدوم على أحد ..

قلت أنا بسم الله الرحمن الرحيم ,, خوفتيني يانووووف ..

قالت .. الحين خلصتوا قلت أيه من زمان .. واللحين أحنا في الطريق راجعين الرياض .. قالت يالله طمني عليك أذا وصلت .. قلت أوكية ..

مشينا وانا الى قبل أن أصل الرياض .. مافتحت رسالتها .. ولا شفت هديتها ..

أتصلت فيني على الساعة ثلاث العصر .. وهي زعلانه مرة .. وتقول ليه تكلف على عمرك وتشتري لي هديه .. أنا ماقلتلك أني ماأقبل أنك تشتري لي شئ ... ليه يانوف .. قلت بس أنا أبيك أنت يامحمد مابي منك شئ ,,,

محمد الله لا يحرمني منك قل آمين ,,, آمين يانوووف

وشوي وهي تفتش في الأغرض قالت لي .. محمد أنت مرسلي أوراق صفراء وش هي قلت أيه هذي مخالفات الطريق .. مخالفات السرعة .. هههههههههههههههههه ذكرت أني حطيتها في الكيس بلغلط يالله خليها عندك ذكري ..


وشوي الا ذيك الصرخة ... بعدها صارت تبكي ..

وش شافت .. شافت صورتي .. وتجلس تبكي تبكي تبكي .. وتقولي أنت ماسويت فيني خيير يامحمد .. ليتك ماجيت وليتك ما عطيتني الصورة ,,, أنت كذا بتزيد عذابي .. يامحمد الله يخليك لي قل آمين .. ولا يحرمني منك ياقلبي .. وتجلس تبكي .. وتبكي

لاحووول يانوف ليه تبكين اللي يسمعك اللحين يقولي أني متوفي ..

وتصرخ في وجهي ذيك الصرخة .. قالت فال الله ولا فالك .. بسم الله عليك الرحمن الرحيم .. الله لا يضرك .. ذكرتني بخوي خالد الله يرحمه ...

الله يرحمه .. محمد اانت اللي تسوق أيه أنا اللي أسوق وراء ماتعطي ذا السلق اللي معك يسوقون .. طيب طيب .. والله أني قلبي طيب .. ماودي أزعلها ووقفت وعطيت صالح يسوق .. وانا جالس أسولف معها على الجوال . . .

شوي الأبنتظار معاي على الجوال .. من معي ويتنق .. ناظرت الجوال الا (mama) معاي علي الجوال .. سكرت من نوووف ورديت علي أمي ,, هلا يمة

قالت سلام عليكم .. قلت : هلا والله

قالت : السلام عليكم .. قلت : هلا والله يمة

قالت : السلام عليكم .. قلت وعليكم السلام ..

قالت : مدري ياولدي الى متي نعلمكم .. قمت أضحك أنا قالت : ايه أضحك أضحك

قالت وينك فيه ياولدي .. ماجيت تتغدي اليوم .. قلت انا والله عندنا شوية شغل .. قالت : بسم الله علي وليدي .. يالله يابوي لا تتأخر اذا طلعت من الشغل .. تعال أرتاح ..

والله يجماعة .. أني مستغرب أتصال أمي .. فعلاً أن قلب الأم دليلها ... شكلها حاسة بشئ ولا ما أتصلت كذا ...


المهم وصلنا الرياض ... نزلت صالح عند سيارته .. ورحت انا وبندر للفندق .. أول ماوصلت فتحت رسالتها ووجدت محفظة أوراق جلدية .. (دوسية) فتحتها لأجد رسالتها ..



وصورة صغيرة لها ولأخوها المتوفي وولد عمها سعود .. مشاري سنة ونصف . . وعيوش أخت مشاري سنة ,,, تموت فيهم نوووف ..

تأملت في صورة نوووف .. ونغزني قلبي عليها ..

وهذا شكلي يوم شفت نووف ..




مشيت البيت رحت أبنام الا أتصال من نوووووف ..


الووووو هلا يانوفي ..

الوووووووو

الوووووووو


الوووووو


ماأحد يجيب ...

((( الحلقـــــة الثامنة عشر )))


الووو

الوووو

وشوي الا أسمع صوت طفل ..

طلع ولد عمها مشاري الصغير يلعب بالجوال وأتصل علي .. ههههههههههههه

وسكرت ورجعت أتصلت عليها .. واعلمها وتجلس تضحك ...

المهم شوي وكلمة حلوة من هينا وكلمة حلوة من هينا .. الين صارت الساعة 2.00

سكرت منها ونمت على طــــووووول ..

صحيت الصباح ورحت العمل .. أنا نزلت أغراض نووووووف عندي بالبيت في شنطة كل أسراري فيها ..

المهم راحت الأيام وجت الأيام ... وانا ونووووف زي العسل ..

من بعد ماشافتني نووووف ذاك اليوم .. وانا في أزعاج رهيب ...

انواع الأتصالات .. ماأدري من وين أنهالت علي ,, صرت أحول جوالي على جوالي أخوي .. عند أنشغال الخط ..


ومن يومها وانا كل ليلة قدامي البرواز ... حبر العيون ودمع القلم في دفتري ...


البنت حبتني حب جنوني ... لدرجة أنها تبغاني أسافر وياها للكويت في طيارة ونسكن سوي ... قلت لا حشي يانوف مانسكن سوي لو تموتين ... قالت لا أنا وبنات خالي مستأجرين شقة في السالمية خمسة غرف وصالون كبير ومكيفات سبيلت مخفي .. وشقة فخمة .. وليرحم والديك تروح وياي ... والله تستانس

قلت يانوف انتي بتروحين لأمك وانا ولد .. تبيني أنوم في شقة كلها بنااااااات ... صاحية ولا مجنونة .. قالت : أصلاً ماراح أخليك راح أكون وياك ... على طووووول

طيب يانووف لكل حادثٍ حديث ... قلت أن شاء الله مارح أخليك ... قلت أنا طيب طيب ماهي مشكلة أفكر .. قالت لا لا زم تروح معي ولا ماني رايحه ...

قلت أوكية .. أروووح معك ... صارت تصارخ من الفرحة ..

في هذا اللحظات رجع لي ضميري يأنبني .. :

قلت في نفسي .. يامحمد

أنت مالك ومال هالبنت .. يالله ياربي غفرانك ..

آآآآآآه ياقلبي ... أنا محمد أسوي كذا لا لا مستحيل يصير الشئ هذا ...

الشيطان ملعووون يامحمد... ممكن أن يصير بينك وبين نوووف .. وبعدها ماينفع الندم ..

لا لا الله يستر .... يامحمد أنت عارف أن البنت تحبك ... والحب يجر صاحبه الى مهاوي الردي لا قدر الله .. يامحمد لا تدنس شرف البنت بلحظة ضعف منك او بضعف منها ... او بضعف منك ومنها .

يالله ,,,, وين الله رمي على هالبنت ...

أنا متأكد أني رجل حازم في مثل هذه الأمور ... انا أدري أن الشيطان شاطر ولكن نقول كذا


محمد

محمد

محمد وشفيك ..


هاه

هلا والله وين رحت لا بس سرحت شوي ..

ياويلي منك وين سرحت بعد ,,,, في ذا الدنيا يانوووف ..


أيه محمد ... تدري وين صورتك اللحين وين ... تحت مخدتي .. وليه تحت المخدة ..

كذا أبيك تكون قريب مني على طووول ... يانووف أحنا أتفقنا أنك تشوفين الصورة وتحرقينها مو تحتفضين فيها .. ماعلى من أحد بالطقاق .. يامجنونة انت مجنونة ... أيه أنا مجنونة بس مجنونة فيك ..

الله يسلمك ..

محمــــــــــــــــــــــــــــــــــــــد أنت تحبني .. لا

هاااااااااااااااااااااااااااه وشو وشو وشو ... أيه أحبك يعني هذا سؤال بالله عليك ..

لا بس حسبت غير كذا ... أحب أسمع منك كلمة ... أحبـــــــــــــــــــــــــــــك

ماني قايل ... ليه يامحمد ... عن جد أنت تجنن .. قولها وانا بناظر صورتك ... يالله اللي يسمعك اللحين يقول أنك ماسكة صورة .. فلان بن فلان ... (( شخصية معروووفة )) ..

بسم الله عليك .. منهم أنت أحلي منه ... لا ني أحلي منه ولا شئ ... كلام فاضي

أعوووذ بالله أنتو يالبنات مشكلة ... أقول محمد لا تصرف قووول أحبـــــــــــــــــــــــــــك ...

لا حوووووووووووول مانسيتي ... لا مانسيت ولاني مسكرة منك الا اللين تقولي كلمة أحبك ...

تنتظر كلمة أحبك .. شايفك مشغول فيها ... بكرة هي اللي تجيك .. محمــــــــــــــــــــــــــــــــــــد بلا أستهبال ,,,


طيب أبقولك قصيدة أحبها .... بس على شرط أنها تكون بمثابة كلمة أحبك .. اوكية أوكية ...

يالله ...

يقول الشـــــاعر :

وهذي فيك يانوووف . ...


الموت حظ القلم والمجد للدفتر *** حبر القلم غلطتي وايامي أوراقي

الخوف يجتاحني وجه الطريق أسمر *** راح أكثر العمر ياخوفي على الباقي

ياجرح رافقتني للناس لا تظهر *** وان عشت في نظرتي مامت بأعماقي

ياصوت لاتلتحف صمتي ولا تصبر *** قل ماتبي واترك الهقوة على الهاقي

والخطوة اللي عن آخر سكتي تقصر *** ماهي من طبع رجليني ولا ساقي

مانيب من عاش لا يربح ولا يخسر *** ولاهو ضروري تكون أفعالي إخلاقي

ثراي ماينشد الغيمة متي تمطر *** مادامها في سماي تحن لأغراقي

رح وين ماتشتهي رح قد ماتقدر *** أنا اول الناس في قلبك وانا الباقي

يكفيني أنك تعذبني وانا أتفجر *** قصايدٍ تنتظرها كل عشاقي

وانا قصيدي يجي مختالني مهجر *** وانبت عشانه نخل وسنيني الساقي


بعدها أنتثر دمعي ... علي خدي ... وأسمع نووف تبكي .. وبكيت معها .. قالت وهي تمسح دموعها خلاص يامحمد لا تقول كلمة أحبك ... أنا عارفه أن كلمة أحبك ماتوفي الغرض ... لكن الآن أقولك يامحمد أني بصير لك كل شئ في حياتك ... ووعد مني أني ما أمشي الطريق اللي يبعدني عنك ..

((( الحلــــــــــــقة التاسعــــــة عـــــــــــــــشر )))


قلت أوكية يانوووف ... بس أبي أسالك يانوووف ..

ماتلاحظين أني علاقتي معاك مالها اي هدف ... وبدون أي مبررات .. انا حبي لك جاء عاطفة وعطف مني على حالك ...

يامحمد اني ما أبي أحد يعطف علي ... انا زينة الحمدالله ... طيب يانوف وش تشوفين فيني أني أقدر أساعدك واوصلك للطريق اللي تبينة ... وش تقصد يامحمد

أقصد أني ماني لك ... صحيح أنا أحبك وممكن أني أسوي المستحيل علشانك .. ولكن أشوف أني لاني محرم لك ولاني أخووووك ولاني قريبك .. يانوف انا ضميري يأنبني في اليوم مية مرة ... بذات معك أنتي ..

يانوف أنتي وش شافيه في محمد ... اللي يكره الساعة اللي عرفتيه فيها ... وانا أبكي بحرقة علي هذي البنت ..

وترد علي بصوت مبحوح ... يامحمد أرحمني وارحم نفسك من اللي أنت فيه ... يامحمد تزوجني وخذني معك بس لا تخليني .. أرجوووووك يامحمد لا تتركني ....

أوكية يانوف ... أنا ماراح أتركك لكن أشوف أن الزواج مستحيل ... ليه ياحمووودي

مدري يانوف أحس أنك بعيدة كل البعد ... عن شريكة حياتي المطلوبة ... ولا والله انتي مافيك قصور جمال ودلال ودين .. وكل الصفات موجودة فيك ..

يانوووف أنتي لازم تعرفين أن فيه غيرك بها الدنيا ... يموتون في الأرض اللي أمشي عليها .. ويموتون في محمد .. لكني أحس أنهم مثل خواتي ... ما أتخيل نفسي في يوم من الأيام متزوج وحدة منهم ...

ما أدري ليه .... مع أن أخواني كثيرين ... وانا أعتبر نفسي الشخصية الغامضة في البيت ... محد يعرف عن أسراري شئ .. نووووف ماعلينا من ها الكلام ...

لحظة يامحمد أنت اللحين تعلمني تبي تقهرني ... ولا تبيني أموووت من القهر ... لا يانوف مو قصدي والله ..

انا قصدي مو من حب محمد وتمناه نال ما تمني ... يانوووف حب من طرف واحد مايدوم ويد وحدة ماتصفق .. صدقيني ... يعني أنت ماتحبني ...


أية أنا ماحبك ...

من جدك يانوف ... صحيح انا ما أحبك بس أموت فيك .. طيب يامحيميد طيب

تعالي وش فيك زعلتي ... نوووف ...تعالي ... هههههههههههههه

نعم ... وش فيك .. كذا مافيني شئ

شدعوا علي أنا يانووووفي .... شحقة دايم ترفع ضغطي .. لا والله ياقلبي ,,, انا ما أرفع ضغطك ولا شئ .. انا من حبي لك ... أمزح معاك

هذا بالله عليك مزح ... عااادي يانووف .. لا موعادي عندي ...


أقول في نفسي :

أيه ياقلبي .. وين الله رمي علي هالبنت ...

صحيح أني أنسان مسالم .. لا لي ولا علي .. لكن مادري وش وصلني لها الحال

والله ياربي أني مدري وش وصلني لها الحال ....

ياربي غفرانك ...

محمد

محمد

محمد

وين رحت وشفيك ماتتكلم ...

أتكلم وش تبيني أتكلم وش تبيني أقوووووووول ,... ماعاد بقي لي كلام ..خلص كل الكلام يانوووف







خلص كل الكلام ولابقي غير القصيد أعتاب *** نشف وجه الجراح ولابقي غير السهر راحه

سلاماتٍ تطولك لا تجيني خايفٍ مرتاب *** تري لك وحشه مثل الظلام إن مات مصباحه

تري لعيوني أكثر من صديق وللخفوق أحباب *** أشوفك تختصرهم في خفوقي ياول جراحه

على هونك .. ترفق ياشتاي البارد الكذاب *** تراها قفلتين الطعنتين ان قلت ذباحه

بشوفك بلمحك بتذكرك لاغابو الغياب *** وأبا أصرخ من حشاي ورحلة الغفران تفاحه

الا ياكبرها وانتي وانا واثنينا الأغراب *** على قلب خساير غيرته في ذمه ارباحه

رهنت لغيبتك ظلٍ نحيل ودمعتين وباب *** على قلبي قفلته والوفا همه ومفتاحه

تفضل نعمه النسيان ماابغي لا ابتعدت اصحاب *** عطايك القديمه والجديد الياس وارماحه

بقي طيفٍ باحرسه في عيوني لك عليه اهداب *** ولاني حاجبه ياوجهته لا هداك مرواحه

خلص كل الكلام اهديت لك لون الوداع واخضاب *** مهر كفٍ دفاها من عذاب مصافحي راحه

((( الحلــــــــــــقة العشــــــــــــــرون )))



آآآآه يامحمد الله لا يحرمني منك ... صح لسانك ياقلبي ...

صح بدنك الله يسلمك ... هذي قصيده محببة الى قلبي يا نووف ..

أقول حمووودي... سمي ياقلبي

متي آخر مرة شفت صورتي .... مدري والله يمكن قبل أسبوع ... تقريباً ... حرام عليك انا كل يوم أشوف صورتك صبح ومساء ... والله ,,, ايه ياحمودي ... كل يوم أصبح عليك ...

طيب يانوف اليوم أشوف صورتك ... و(؟؟؟؟؟؟؟؟؟؟؟؟؟) بعد وش تبين أكثر من كذا ...

تسلم حبيبي ... يالله أخليك تنام ... أوكية ياعمري ...


باي

باي

المهم بعد مكالمتي لنووووف ... فتحت شنطتي .. وطلعت صورة نوووف .. أناظر فيها وهي تناظر فيني خجلانة .. ياعمري يانوووف ... والله البنت مزيونة ... وحلوة بس ماكنت أتحمل أناظر فيها أكثر من دقيقة .. مدري أحس بخجلها مني حتي بالصورة ...

أستلقيت على سريري .. وطول ليلي أفكر فيها ... والله البنت حبوبة وطيبه مرة ...

يالله ... فكرت أبعد عنها كثير ,,, لكن

كل ماتذكرت مرضها وتذكرت عمها فهد اللي مضتهدها حزنت وحنيت عليها ... مرة أقول في نفسي ماراح أترك البنت أبد اللين تتزوج وتشوف طريقها ... ومرة اقول لا لازم أبعد عنها ...


أيه ياقلبي .... ماني قادر أسوي شئ لها البنت المسكينة ... المشكلة أنها بنت ,,, لو كانت ولد كان بقول الوالد يتحمل ماعليه ... لكن البنت مشكلة ماتتحمل .. والبنت بطبعها حساسة ..

والله فكرت كثير ... لكن من دون فايدة ..


المهم مرة فترة طويلة جداً واحنا مع بعض ... البنت شلت كل تفكيري ...

اللين مرة وانا أناظر صورتها نسيت الشنطة مفتوحه ...

وجت الشغالة الله ياخذها ... وهي تنظف غرفتي ... طاحت يدها على صورة نوف جعل يدها الكسر ..

وعلى دخلت أمي .. وتوريها الصورة تقول .. مين هذا ماما ...

وامي تشوف الصور وتقرأ الرسايل ... وتطلع الفضايح .. الله يستر

ايه أنا توني ماخذلي دش ... وداخل غرفتي الا أمي جالسة تبكي وحاطه يدها على راسها ,,,

وش السالفة ... وتستلمني محاضرة .. وش انت جايب جعله مايجيلك خير ... من ذي صورته ومن متي تعرفها حسبي الله على بنات اليوم وحسبي الله عليها وعلى .. أهلها اللي ماربوها ...

يايمة .... لحظة أبفهمك .. وش تفهمني أقلب وجهك عني .. لا عاد تشوفك عيني ... (يالسربوت )

كنت أحسبك العاقل ... قدوة أخوانك ... طلعت أرداهم .. يمة أفهميني ... رح ياولدي ولا عاد أشوفك قدام وجهي .. خذ صورة (؟؟؟؟؟؟؟؟) ولا عاد أشوفك عندي ... رح لها خلها تنفعك ؟؟؟؟؟

خذ شنطتك ولاعاد أشوفك هينة .. وتجلس تبكي تبكي تبكي ... أرتفع السكر عليها ... وحالتي وياها حالة ... ماودي أجادلها يصير فيها شئ ... واحب راسها واحب يدها .. وتجلس تبكي واستسمحها تسامحني .. لكن الله يهديها ..


المهم بدلت ملابسي ... وخذيت أغراض نوووف ... واحطها معاي بالسيارة ... واجلس أدور بالسيارة ما أدري وين أروح .. وشوي الا أمي تكلمني ومازالت تبكي ...

قالت لي هذي الكلمة ... القوية ... :

ياولدي يامحمد .... برضاي عليك تترك هالبنت ... برضاي عليك ياولدي ...


لاحووووووول .. ايه وش أسوي .. وش أقول... خلاص أنكشف أمري ... والله غالب أمرة

صارت حياتي .. بعد هذا المأزق في جحيم ... وش أسوي

اللحين أمي ... تقوووول لازم تترك هالبنت ... ونوف ماراح تتركني لوعرفت السالفة ...


جلست ذيك الليلة المشؤمة مواصل ورحت الدوام ومواصل ... الى الساعة 5.30 من اليوم الثاني .. وانا مانمت واصلت 21 ساعة ... صاير زي المجنون خلاص معاد أحس باللي حولي ...


أعوذ بالله من الشيطان الرجيم .... ياربي وش أسوي ,,, وش اسوي ...

صارت الوالدة تصحي أخواني لجامعاتهم وانا ماتصحيني ... ولا تكلمني ولا تعطيني وجة ....

بصـــــــــــــــــــــــــــــــــراحة .... الحياة بدون الوالدة ولاتســـــــوي بعيني شئ ...

المهم قررت بعد اللي صار بيومين ... أني أصارح نوووف وأتركها لوجه لله سبحانة وتعالي ... ورضاء لوالدتي ...


أتصلت في نوووف ... وماردت علي ....

ولين هذا وقته ... واتصل فيها مرة ثالثة ورابعة ومافيه فايدة ... اللين أتصلت فيني هي بعد ثلاث ساعات ... وكانت الساعة وقتها 8.00 مساءٍ يوم خميس ... أتصلت علي وشرحت لها الظرووف اللي أنا مريت فيها ... ومع الورطة اللي وقعت فيها ...

وصارت تصرخ وتقوووول محمد صورتي وينها ....

صورتك مكبرينها ومعلقينها بالصالة ... وكاتبين تحتها ( wanted) وين يعني وين أكيد معي ... اشوي يعني ماشالتها أمك لا يابنت الحلال ...


نوووف أنتي لازم تعرفين شغلة .. نوف أمي ماهي راضية علي الا في حالة وحدة ... أنك تبعدين عن طريقي .. وبصراحة أنا ماعندي أستعداد أني أزعل أمي لرضاك ... يانوووف


كل شئ أنتهي ... وهذي النهاية اللي عمري ماتمنيتها ..... ولكن شئ فوق أرادتي واردتك ...

يانووووووف ...



طوط



طوط



طوط

الحمدالله أنها أنتهت على كذا ....

بصراحة أنا كنت أفكر أني راح أصبر .... على هذا الوضع ..... رجعت لأمي وأستسمحت منها وحلفت لها بالله أني تركت البنت واني ماراح أرجع لها مرة ثانية ... ورضت على بعد فترة ماهي بالقصيرة ...


أنا صحيح تركت نووووف .... لكن صدقوني ياجماعة ... دمعتي أحرقت جفني ... من بعد فرقاها ...


بعدها أرسلت رساله .... تقول فيها :