قالت إكتب مثل غيرك ماكتب
عن جمالي والعيون الذايبَه
عن دلالي عن غروري في أدب
عن فتاه مدلّعه مؤدّبَه
أثبت إنك تكتب الشعر الصعَب
والجمال اللي تشوفه تكتبه
كل شاعر شافني شاف العجب
مستحيل يشوفني. ماأعجبه
يكتب الفتنه وهي تضحك غضب
ويَسْرِد أنواع الجمال مْرَتّبَه
لين أشوف إنه تمادى واقترب
وأدري إن القرب مني مطلبَه
وأدري إنّه في أحاسيسه كذب
كل همّه كلمتين تقرّبه
أرفضه باسلوب ولنفس السبب
وأرفض أسلوبه بعد وأكذّبه
سطّروا فيني حروف من الذهب
وإعتَلوا أعلى حُدود المَوهبه
سِحرهم في الشعر مايوم إنغلب
بسّ واجَه رِمش عيني وغْلبه
يَلّله..إكتب شيّ.. وإعتبره طلَب
وانت أول من تنازلت أطلبه
لأنّك أوّل من لمحني وإنسحب
دون عيني وحدها ماتجذبه!!
لين فارقني غروري وانقلب
شاعرٍ طيّح غروري وقلبه
يلّله .إكتب. لاتخاف من العتب
وإن فشلت..( أبعتبرها تَجْرُبَه)
لوتفتّش في دواوين العرب
وأجمل أنواع القصيد وأعذبه
مانحفظ في الشعر كلّه وانكتب
بيت يوصفني وإذا عندك.. جِِبَه
الشعر والنثرْ وأنواع الأدب
وَصّفَتْ (بعْضِي)..وأنا متحَجِّبه
قلت فِعلاً. ولله إن الله وهَب
جمّع الزين. وعطاك من أطيبه
بسّ ولله.لو كتبت( إبْلاَ تعب )
لَكْتِب - اللي ماحدٍ فيك كتبَه -
إنتي أجمل من (عناقيد العِنب)
لوْن بستانٍ . تِبَاهى بِعْنبَه
وانتي أحلىمن(ثمَرْ حِلو الرطب)
سُكّرٍ مَحبوس في جوف رطبَه
لو وقفتي عند (حسّاب الحِسب
)ضيّع اللي طول عمره يحسبه
ولو دخلتي عند (قارون) إنّكَبْ
ضاع مالَهْ كِلّه ..وباعْ ذْهَبَه
ولو برَزتي ضدّ (عنتر) ماغلب
طيّح السيف ونسى اللّي حاربَه
ولو لمَحك (الزير) في الحرب انسحب
مابقى له ثار.... وانتي مَطْلبَه
ولو لمَح (جسّاس) زولك ماهرَب
قال: سلّمني (لسالم) يايبه
ولله إنّك تقهرين (أطلَق شنب)
وتَجْبرين إيده (على فَتْل شْنِبَه)
هذا وَصْفِي فيك..وإن قلتي:كِذَبْ.
ماسمَعتي (أعذَب الشعر أكذِبَه؟